كان فى ست غلبانه جدا مبتعرفش تقرأ ولا تكتب,المهم راحت لابونا و شكتله حالها و انها ولا بتقرأ فى الانجيل ولا بتصلى, فحاول ابونا يساعدها فقالها هديكى كل اسبوع جمله تحفظيها و تقوليها طول الاسبوع و تيجى الاسبوع اللى وراه تسمعيها و تاخدى الجديده قالها ماشى قالتله ماشى قالها قولى ورايا اسبحك و امجدك ياربى يسوع المسيح, المهم حفظت الست الغلبانه الجمله و روحت بيتها وانها تفتكر اللى قاله ابونا مافتكرتش غير اشنكحك و امنكحك ياربى يسوع المسيح و فضلت طول الاسبوع تقول الجمله دى و هى فرحانه و سعيده بوجود ربنا فى حياتها وجه ميعاد الجمله الجديده فراحت لابونا و سمعت الجمله اللى حفظتها و بمجرد ما فتحت الست الغلبانه بقها و قالت اشنكحك و امنكحك ياربى يسوع المسيح و انفجر ابونا فيها و قالها مادام مابتعرفوش تتكلمو مع ربنا بتتكلمو ليه لدرجه انه حرمها من التناول فالست مش فاهمه حاجه ولا عارفه هى عملت ايه تستاهل عليه كل دا و راحت فى اخر الكنيسه و من العياط نامت و صحيت الصبح لقيت القداس هيبتدى فقالت احضره و احاول اتناول دا ابونا طيب و هيناولنى ,المهم ابونا ناولها و اداها بركه قربانه حمل كبيره سخنه و هى خارجه قابلت ابونا داخل فشكرته انه سامحها و ناولها قالها ناولتك!! هو انا اساسا بديت القداس , فقالتله ازاى يا ابونا دا انت حتى مدينى القربانه دى مسك ابونا القربانه منها لقاها سخنه فهم انها حضرت قداس مع السواح فقالها روحى يا بنتى شنكحيه و منكحيه براحتك
........................................................................................
شوفتوا بي اد ايه الحياه مع ربنا سهله وبسيطه لو كنت بسيط اوي ومش عارف حاجات كتير عن ربنا و مش مثقف وكده صدقني برده طالما حطيت ربنا في قلبك هتحس بيه وهتعيش معاه الموضوع مش محتاج فلسفه ربنا بيحبنا كلنا بسطاء واقوياء وضعاف المهم مين بيحب ربنا وهل انت عايزه ولا مش في دماغك اصلا؟؟؟؟
فكر وشوف ربنا فين في حياتك وبلاش حجج بقي اديك شوفت الست الغلبانه دي ايه اللي حصله رغم كل بساطته ومتهيالي انك مش بسيط زيها انت اكيد مثقف وعارف ودارس كويس يبقي شوف بقي انت ربنا هيقبل منك ازاي
كفايه حجج بقي يلا بسرعه ربنا عايزك كده بكل عيوبك وممكن مميزاتك
موضوع: اشنكحك وامنكحك يا ربى يسوع 
الأربعاء ديسمبر 30, 2009 12:13 pm
